മാവിലായിയിലെ കുട്ടിപ്പട്ടാളം
മാവിലായിയിലെ കുട്ടിപ്പട്ടാളം
രഞ്ജിത്ത്കുമാര്‍ എന്‍ വി
ഹെഡ് മാസ്റ്റര്‍, മാവിലായി യു പി സ്‌കൂള്‍, കണ്ണൂര്‍
കുഞ്ഞിളം കൈകളില്‍ പതയുന്ന നന്മ’- മാവിലായി യുപി സ്‌കൂള്‍ നിർമ്മിക്കുന്ന സ്വദേശി ഉൽപന്നമായ കുട്ടി സോപ്പിന്റെ കുട്ടികൾ തന്നെ കണ്ടെത്തിയ പരസ്യ വാചകം ഇങ്ങനെയാണ്. ഇതിനെ അന്വർഥമാക്കുന്ന നേട്ടങ്ങളും നന്മയുമാണ് സ്‌കൂള്‍ ഹരിത സേനയായ ‘കുട്ടിപ്പട്ടാളം’ അവരുടെ നാട്ടിലും വീടുകളിലും സ്‌കൂളിലും പ്രസരിപ്പിക്കുന്നത്. ഒരു സ്‌കൂളിന്, അവിടെയുള്ള കുഞ്ഞുങ്ങള്‍ക്ക് നാടിന്റെ മാറ്റത്തിന്റെ പതാകാവാഹകരാകാനാകുമെന്നതിന്റെ സാക്ഷ്യമാണ് മാവിലായി യുപി സ്‌കൂള്‍.
അഞ്ച്, ആറ്, ഏഴ് ക്ലാസുകള്‍ മാത്രമായി പ്രവര്‍ത്തിച്ചു വരുന്ന മാവിലായി യു.പി സ്‌കൂളിലെ കുട്ടികൾ നാടിനു നൽകുന്ന വലിയ സന്ദേശങ്ങളാണ് ‘എന്റെ ഗ്രാമം എന്റെ അഭിമാനം’ എന്ന പദ്ധതിയില്‍ വിരിഞ്ഞത്. കുട്ടികൾ സ്വന്തമായി നിർമ്മിക്കുന്ന കുട്ടി സോപ്പ്, കുട്ടി ഹാന്‍ഡ് വാഷ്, കുട്ടി സഞ്ചി, കുറ്റിച്ചൂൽ, ഡി-ബ്രഷ്, ഡി-മാറ്റ് എന്നീ ഉൽപന്നങ്ങൾ സമൂഹം ഏറ്റെടുത്തതിനു പുറമേ കുട്ടികളുടെ വീടുകളിലും സ്‌കൂളിലും ജൈവ പച്ചക്കറി വിളയിച്ചും കുട്ടിപ്പട്ടാളം മാവിലായി മാതൃക സൃഷ്‌ടിക്കുന്നു.
എല്ലാ കുട്ടികളുടെ വീടുകളിലും പ്ലാസ്റ്റിക് മാലിന്യം, ജൈവ മാലിന്യം എന്നിവ തരം തിരിച്ച് നിക്ഷേപിക്കാന്‍ പ്രത്യേകം ബിന്നുകൾ സ്ഥാപിച്ച് വലിച്ചെറിയല്‍ മുക്ത ഭവനം എന്ന ആശയം നടപ്പിലാക്കിയ കുട്ടികൾ കോമ്പൗണ്ട് ഹരിത ശുചിത്വ സുന്ദരമാക്കി സൂക്ഷിക്കുന്നു. ഓടുന്ന വാഹനങ്ങളില്‍ നിന്ന് മാലിന്യം വലിച്ചെറിയുന്നത് ഒഴിവാക്കാന്‍ 2024 നവംബര്‍ 1-ന് കേരളപ്പിറവി ദിനം മുതല്‍ ഒരാഴ്‌ചക്കാലം സ്‌കൂള്‍ റോഡിലൂടെ കടന്നു പോയ വാഹനങ്ങള്‍ക്ക് കുട്ടികൾ സ്വന്തമായി തയ്യാറാക്കിയ കുട്ടി സഞ്ചിയും ലഘു ലേഖയും വിതരണം ചെയ്‌ത് മാലിന്യ മുക്ത നവ കേരളത്തിന്റെ സന്ദേശം പ്രചരിപ്പിച്ചു. സ്‌കൂള്‍ റോഡിലൂടെ പോയ 48 വാഹനങ്ങളില്‍ സഞ്ചിയും ബോധവല്‍ക്കരണ നോട്ടീസും കുരുന്നകൾ നൽകി. വാഹനങ്ങളില്‍ വേസ്റ്റ് ബിന്‍ സ്ഥാപിക്കണമെന്ന് ആവശ്യപ്പെട്ട് കുട്ടികൾ മുഖ്യമന്ത്രിക്കും വിദ്യാഭ്യാസ മന്ത്രിക്കും നിവേദനം നൽകിയിട്ടുണ്ട്.
സ്ഥലപരിമിതി കാരണം കുട്ടികളിൽ കായിക വിനോദം കുറയുകയും അതുവഴി കുട്ടികളിൽ മാനസിക സമ്മര്‍ദം ഉള്‍പ്പെടെയുള്ള പ്രയാസങ്ങള്‍ കണ്ടു വരുന്നതായി സ്‌കൂള്‍ ശാസ്ത്ര ക്ലബ് നടത്തിയ പഠനത്തില്‍ കണ്ടെത്തിയതിന്റെ അടിസ്ഥാനത്തില്‍ എല്ലാ കുട്ടികൾക്കും സ്‌കിപ്പിംഗ് റോപ്പ് നല്‍കുകയും എല്ലാവരും സ്‌കിപ്പിംഗ് ബെല്‍ സമയത്ത് സ്‌കിപ്പിംഗ് ചെയ്‌തു വരുന്ന ഹെല്‍ത്ത് ഈസ് വെല്‍ത്ത് പദ്ധതിയായ കുട്ടിച്ചരടും മാവിലായി സ്‌കൂളിന്റെ പ്രത്യേകതയാണ്. കഴിഞ്ഞ വര്‍ഷങ്ങളില്‍ സ്‌കൂള്‍ നടത്തിയ പദ്ധതി ഈ വര്‍ഷവും തുടരുന്നു. ഈ മാതൃക പിന്തുടർന്ന് കണ്ണൂര്‍ ജില്ലാ പഞ്ചായത്ത് ജില്ലയിലെ 12000 ഹൈസ്‌കൂള്‍ വിദ്യാര്‍ത്ഥികള്‍ക്ക് സ്‌കിപ്പിംഗ് റോപ്പ് നൽകിയതും സ്‌കൂളിന് അഭിമാന നേട്ടമാണ്. ഇത്തരത്തില്‍ നൂതന ആശയങ്ങളുമായി മാലിന്യ സംസ്‌കരണ രംഗത്തും പാഠ്യ-പാഠ്യേതര മേഖലകളിലും മുന്നേറുകയാണ് ഈ പൊതു വിദ്യാലയം. എടക്കാട് ബ്ലോക്ക് പഞ്ചായത്ത് ശുചിത്വ ഹരിത വിദ്യാലയ അവാര്‍ഡ് ഉള്‍പ്പെടെ നിരവധി അംഗീകാരം നേടി മാവിലായി മാതൃക എങ്ങും പരത്താനായുള്ള ശ്രമത്തിലാണ് മാവിലായി യുപി സ്‌കൂളിലെ കുരുന്നുകളും അധ്യാപകരും..
