തീര്‍ഥാടന നഗരിയും വാണിജ്യ നഗരിയും
തീര്‍ഥാടന നഗരിയും വാണിജ്യ നഗരിയും
ഐശ്വര്യ പി.എസ്
ഐ പി ആര്‍ ഡി
നാടുവാഴിക്കാലം തൊട്ട് വാണിജ്യ കേന്ദ്രമായി നിലനിന്ന കുന്നംകുളത്തിന് മാലിന്യം എല്ലാക്കാലത്തും വലിയ പ്രതിസന്ധിയായിരുന്നു. മാലിന്യക്കൂമ്പാരം മൂലം കുറുക്കന്മാരുടെ വാസസ്ഥലമായി മാറിയ കുറുക്കന്‍പാറ എന്ന പ്രദേശത്ത് ഇന്ന് ലോകോത്തര മാതൃകയിലുള്ള മാലിന്യ സംസ്‌കരണ പ്ലാന്റാണ്. വികേന്ദ്രീകൃത മാലിന്യ സംസ്‌കരണത്തില്‍ ഊന്നി സാധ്യമാകുന്നത്ര മാലിന്യത്തെ ഉറവിടത്തില്‍ തന്നെ സംസ്‌കരിച്ച് ശേഷിക്കുന്നവയെ ഉറവിടത്തില്‍ തന്നെ വേര്‍തിരിച്ച്, കുറുക്കന്‍പാറയിലെ കേന്ദ്രീകൃത സംവിധാനം വഴി സംരംഭകത്വ മാതൃകയില്‍ പുന: ചംക്രമണത്തിന് വിധേയമാക്കിയാണ് കുന്നംകുളം നഗരസഭ ഈ പ്രതിസന്ധിക്ക് പരിഹാരം കണ്ടത്. 2008-ല്‍ പ്രാരംഭ നടപടികള്‍ ആരംഭിച്ചു. 2016 ഒക്ടോബര്‍ 6 മുതല്‍ മാലിന്യത്തില്‍ നിന്നും ജൈവ വളം നിർമ്മിക്കുന്ന സംസ്‌കരണ കേന്ദ്രമായി കുറുക്കന്‍ പാറയെ മാറ്റി. പ്രാദേശികമായി നിരവധി സ്ത്രീകള്‍ക്ക് തൊഴില്‍ നല്‍കാനും പദ്ധതി വഴി കഴിഞ്ഞു.
ഐ.ആര്‍.ടി.സി വികസിപ്പിച്ച മൈക്രോ ബിയല്‍ എൻറിച്‌ഡ് കൊയര്‍ പിത്ത് ബേസ്‌ഡ് എയ്റോ കമ്പോസ്റ്റിംഗ് സാങ്കേതിക വിദ്യയുടെ സഹായത്തോടെ പ്രതിദിനം എട്ട് ടണ്ണോളം മാര്‍ക്കറ്റ് മാലിന്യം ശേഖരിച്ച് ശാസ്ത്രീയമായും ശല്യ രഹിതമായും സംസ്‌കരിക്കാന്‍ കഴിയുന്ന കേരളത്തിലെ ആദ്യ ആധുനിക മാലിന്യ സംസ്‌കരണ സംവിധാനമാണ് നഗര സഭയുടെ ഗ്രീന്‍ പാര്‍ക്കിലുള്ളത്.
ജൈവ മാലിന്യങ്ങളിലെ ഈര്‍പ്പം നിയന്ത്രിക്കുന്നതിനായി ചകിരിച്ചോറിനെ ഉപയോഗപ്പെടുത്തിയും ഇനോക്കുലത്തിന്റെ ഉപയോഗം വഴി കമ്പോസ്റ്റിങ്ങിനെ നിയന്ത്രിച്ചും യന്ത്രവല്‍ക്കരണത്തെ ഈ പ്രവര്‍ത്തനങ്ങളോട് വേണ്ടവിധം കണ്ണിചേര്‍ത്തുമാണ് കുന്നംകുളത്തെ മാലിന്യസം സ്‌കരണ രീതി.
മാലിന്യത്തെ അറിഞ്ഞ് സംസ്‌കരിക്കുക എന്ന വിദ്യയാണ് നഗര സഭ പ്രായോഗിക തലത്തില്‍ ഉപയോഗിച്ചത്. മാലിന്യത്തെ ജൈവ-അജൈവമായി തരം തിരിച്ച് ഗാര്‍ഹിക തലം മുതല്‍ മാലിന്യ സംസ്‌കരണം എന്ന ആശയം ഉയര്‍ത്തി. അതിന് ആവശ്യമായ ബോധവല്‍ക്കരണവും നടത്തി. മാലിന്യ സംസ്‌കരണത്തെ കുറിച്ച് പഠിക്കാന്‍ ഗ്രീന്‍ ടെക്നോളജി സെന്ററും ഇവിടെ യാഥാർഥ്യമാക്കിയിട്ടുണ്ട്.
നല്ല വീട് നല്ല നഗരം പദ്ധതി
ഓരോ വാര്‍ഡും ശുചിത്വ പദവി കൈവരിച്ച് നഗരസഭയുടെ സമ്പൂര്‍ണ്ണ ശുചിത്വ പ്രഖ്യാപനം നടത്തുന്ന കേരളത്തിലെ ആദ്യ നഗരസഭയാണ് കുന്നംകുളം നഗരസഭ. നല്ല വീട് നല്ല നല്ല നഗരം പദ്ധതി ആവിഷ്‌കരിച്ചും അത് പൂര്‍ണ്ണമായി നടപ്പാക്കിയുമാണ് നഗരസഭ ഈ നേട്ടം കൈവരിച്ചത്. മൂന്നുമാസം നീണ്ടു നിന്ന വിപുലമായ ബഹുജന ക്യാമ്പയിനിലൂടെ നഗരത്തിലെ 13,195 വീടുകളിലും ഉറവിട ജൈവ മാലിന്യ സംസ്‌കരണ ഉപകരണങ്ങളും അത്രയും വീടുകളില്‍ ഹരിതകര്‍മ്മ സേന രജിസ്ട്രേഷനും ഉറപ്പാക്കി. നഗരത്തിലെ കച്ചവട കച്ചവടേതര സ്ഥാപനങ്ങളും ഓഫീസുകളിലും വേര്‍തിരിച്ച ജൈവ അജൈവ മാലിന്യങ്ങള്‍ കൈമാറുന്നതിനുള്ള രജിസ്ട്രേഷന്‍ പൂര്‍ത്തീകരിച്ചു. 1800 രൂപ വിലയുള്ള ബയോ ബിന്നും 13,500 രൂപ വിലയുള്ള ബയോഗ്യാസ് പ്ലാന്റും 90 ശതമാനം സബ്‌സിഡിയോടെയാണ് ഉപഭോക്താക്കള്‍ക്ക് നല്‍കിയത്.
ശ്‌മശാന ഭൂമിയെ പൂങ്കാവനമാക്കി ഗുരുവായൂര്‍ നഗര സഭ
മൂന്നര ഏക്കറില്‍ മുഴുവന്‍ മാലിന്യങ്ങള്‍. അജ്ഞാത മൃതദേഹങ്ങള്‍ സംസ്‌കരിച്ചിരുന്ന സ്ഥലം. അങ്ങനെ ഒരു കാലത്ത് ശവക്കോട്ടയായും മാലിന്യക്കൂമ്പാരം നിറഞ്ഞും ദുര്‍ഗന്ധം പരത്തിയ സ്ഥലം ഇന്ന് പൂങ്കാവനവും കുട്ടികളുടെ കളിയിടങ്ങളുമാണ്. മാലിന്യ നിക്ഷേപത്തിനെതിരെ നിരവധി സമര പരമ്പരകള്‍ അരങ്ങേറിയ കേന്ദ്രം കൂടിയായിരുന്നു ഗുരുവായൂരിലെ ചൂല്‍പ്പുറത്തെ ശവക്കോട്ട. മഴക്കാലത്ത് ഇവിടെ നിന്നും വരുന്ന ദുര്‍ഗന്ധവും മലിന ജലവും കാരണം സമീപവാസികള്‍ക്കും യാത്രക്കാര്‍ക്കും നിരവധി പ്രതിസന്ധികള്‍ സൃഷ്‌ടിച്ചിരുന്നു. മൂക്ക് പൊത്താതെ ഇതു വഴി കടന്നു പോകാൻ കഴിയുമായിരുന്നില്ല.
വിവാഹം, ക്ഷേത്ര ദര്‍ശനം, തീര്‍ഥാടന ടൂറിസം എന്നിങ്ങനെയായി പ്രതി വര്‍ഷം മൂന്നു കോടിയിലധികം ജനങ്ങള്‍ വന്നു പോകുന്ന ഗുരുവായൂരില്‍ മാലിന്യ നിക്ഷേപ കേന്ദ്രമായ ചൂല്‍പ്പുറത്ത് ശാസ്ത്രീയ മാലിന്യ സംസ്‌കരണം വഴി സ്വപ്‌ന തുല്യമായ മാറ്റങ്ങളാണ് സംഭവിച്ചത്. 2009-ല്‍ ഗ്യാസ് ക്രിമറ്റോറിയം ആരംഭിച്ചാണ് ഈ വിപ്ലവ മാറ്റത്തിന് തുടക്കം കുറിച്ചത്. പിന്നീട് 3500 സ്‌ക്വയര്‍ ഫീറ്റ് വിസ്‌തീർണ്ണത്തിൽ മാലിന്യം വേര്‍തിരിക്കാന്‍ വിപുലമായ എം.സി.എഫ് സംവിധാനം ഏര്‍പ്പെടുത്തി. വഴിയോര വിശ്രമ കേന്ദ്രം, കുട്ടികൾക്കായി കളിയിടം എന്നിവയും സജ്ജീകരിച്ചു. കല്യാണമണ്ഡപങ്ങള്‍, ഹോട്ടലുകൾ എന്നിവിടങ്ങളിലെ ജൈവ മാലിന്യത്തെ വളമാക്കി വില്‍പന നടത്താനും ഇതു വഴി കഴിഞ്ഞു. പ്ലാസ്റ്റിക് ഉപയോഗം പൂര്‍ണ്ണമായും ഒഴിവാക്കി. യൂസര്‍ ഫീ കളക്ഷന്‍, ബയോബിന്‍ വിതരണം എന്നിവ കാര്യക്ഷമമാക്കി.
ഗുരുവായൂര്‍ അഴുക്കുചാല്‍ പദ്ധതി
അരനൂറ്റാണ്ടിന്റെ കാത്തിരിപ്പിനൊടുവില്‍ തൃശൂര്‍ ജില്ലയിലെ ആദ്യ മാലിന്യ സംസ്‌കരണ പ്ലാന്റ് ഗുരുവായൂരില്‍ യാഥാര്‍ഥമായി. മലിന ജലം സംസ്‌കരിച്ച ശേഷം പുനരുപയോഗത്തിനുള്ള ജലമായി മാറ്റിയെടുക്കുന്ന ചക്കംകണ്ടത്തുള്ള മാലിന്യ സംസ്‌കരണ പ്ലാന്റ് കമ്മീഷന്‍ ചെയ്‌തതോടെ പ്രദേശവാസികള്‍ക്കും ക്ഷേത്ര നഗരിയില്‍ എത്തുന്ന തീര്‍ഥാടകര്‍ക്കും ഒരുപോലെ ആശ്വാസമായി. ചക്കംകണ്ടത്ത് സ്ഥാപിച്ചിരിക്കുന്ന മൂന്ന് ദശ ലക്ഷം ലിറ്റര്‍ ശേഷിയുള്ള മാലിന്യ സംസ്‌കരണ ശാഖ, മൂന്ന് സംഭരണ കിണറുകള്‍, മൂന്ന് പമ്പ് ഹൗസുകള്‍, 7.34 കിലോമീറ്റര്‍ നീളമുള്ള സ്വീവറേജ് സംഭരണ ശൃംഖല, പമ്പു സെറ്റുകള്‍, ജനറേറ്ററുകള്‍, 256 മാന്‍ഹോളുകള്‍ എന്നിവയാണ് പദ്ധതിയുടെ പ്രധാന ഘടകങ്ങള്‍. 1973-ല്‍ തുടക്കം കുറിച്ച പദ്ധതിയാണിത്.
മൂന്നു സോണികളിൽ നിന്നുള്ള മാലിന്യങ്ങള്‍ ഏറ്റവുമൊടുവില്‍ സംഭരിക്കുന്നത് ഒന്നാമത്തെ പമ്പ് ഹൗസിലാണ്. അവിടെ നിന്ന് മാലിന്യങ്ങള്‍ പൈപ്പ് വഴി ചക്കംകണ്ടം പ്ലാന്റിനു മുന്നിലെ വലിയ ടാങ്കിലേക്ക്. ടാങ്കിലെ മാലിന്യങ്ങള്‍ പ്രത്യേക ചാനല്‍ വഴി പ്ലാന്റിലെ ഗ്രിഡ് ചേംബറിലേക്ക്. ചാനലില്‍ വെച്ച് സാന്ദ്രതയുള്ള മാലിന്യങ്ങള്‍ വേര്‍തിരിക്കപ്പെടും. ഗ്രിഡ് ചേംബറില്‍ നിന്ന് പ്ലാന്റിലെ ടാങ്കിലേക്കും അവിടെ നിന്ന് പമ്പ് ചെയ്‌ത് ബയോളജിക്കല്‍ റിയാക്‌ടറിലേക്കും. ബാക്‌ടീരിയ ഉപയോഗിച്ച് സംസ്‌കരണ പ്രക്രിയ നടക്കുന്ന ഘട്ടമാണിത്. ഒടുവില്‍, കാർബൺ ഫിൽട്ടർ ചേമ്പറിലൂടെ മാലിന്യം കടത്തിവിട്ട് വെള്ളത്തിലെ കോളിഫോമിന്റെ അംശങ്ങള്‍ വേര്‍ തിരിച്ച ശേഷം ശുദ്ധീകരിച്ച് പുറത്തേക്കു വിടും.