സൗജന്യചികിത്സയില്‍ അഭിമാനത്തോടെ കേരളം
കേരളത്തിന്റെ ആരോഗ്യരംഗം സമാനതകളില്ലാത്ത വെല്ലുവിളികള്‍ നേരിട്ട മൂന്നര വര്‍ഷമാണ് കടന്ന് പോയത്. കോവിഡിനൊപ്പം നിപ, മങ്കിപോക്‌സ്, സിക, മറ്റ് പകര്‍ച്ചവ്യാധികള്‍, പ്രളയാനന്തര വെല്ലുവിളികള്‍ എന്നിവയേയും അതിജീവിക്കാന്‍ സാധിച്ചു. ഇത്രയേറെ വെല്ലുവിളികള്‍ നേരിട്ടപ്പോഴും ആരോഗ്യ രംഗത്ത് വളരെയധികം വികസനപ്രവര്‍ത്തനങ്ങള്‍ നടത്താന്‍ കേരളത്തിനായി. നമ്മുടെ പല ആരോഗ്യപദ്ധതികളും ദേശീയശ്രദ്ധയാകര്‍ഷിച്ചു. അതിലൊന്നാണ് സൗജന്യചികിത്സ. രാജ്യത്ത് കഴിഞ്ഞ മൂന്ന് വര്‍ഷമായി ഏറ്റവും അധികം സൗജന്യചികിത്സ നല്‍കുന്ന സംസ്ഥാനമാണ് കേരളം.
വിവിധ പദ്ധതികളിലൂടെയാണ് സംസ്ഥാനം സൗജന്യചികിത്സ ഉറപ്പാക്കുന്നത്. സംസ്ഥാന ആരോഗ്യവകുപ്പിന് കീഴില്‍ പ്രവര്‍ത്തിക്കുന്ന സ്റ്റേറ്റ് ഹെല്‍ത്ത് ഏജന്‍സിയിലൂടെ സമഗ്ര ആരോഗ്യ പരിരക്ഷ ഉറപ്പാക്കുന്ന പദ്ധതിയാണ് കാസ്പ്. പദ്ധതിയില്‍ അംഗങ്ങളായ 581 സര്‍ക്കാര്‍, സ്വകാര്യ ആശുപത്രികളിലൂടെയാണ് സൗജന്യ ചികിത്സ ലഭ്യമാക്കിവരുന്നത്. ഇത്തരത്തില്‍ എംപാനല്‍ ചെയ്ത ആശുപത്രികളില്‍ സജ്ജമാക്കിയിട്ടുള്ള കാസ്പ് കിയോസ്‌ക്കുകള്‍ മുഖേന പദ്ധതിയുടെ അനുബന്ധസേവനങ്ങള്‍ ലഭ്യമാക്കി വരുന്നു.
ഈ സര്‍ക്കാരിന്റെ ആരംഭത്തില്‍ 2.5 ലക്ഷം ആളുകള്‍ക്കാണ് പ്രതിവര്‍ഷം സൗജന്യചികിത്സ നല്‍കിയതെങ്കില്‍ 2024ല്‍ 6.5 ലക്ഷം പേര്‍ക്കാണ് സൗജന്യചികിത്സ നല്‍കിയത്. ഒരു കുടുംബത്തിലെ ഓരോരുത്തര്‍ക്കും അഞ്ച് ലക്ഷം രൂപ വരെ ആരോഗ്യ പരിരക്ഷ ഈ പദ്ധതിയിലൂടെ ലഭിക്കുന്നു. നിലവില്‍ കാസ്പിന് കീഴിലുള്ള 42 ലക്ഷം ഗുണഭോക്താക്കളില്‍ 20 ലക്ഷത്തിലധികം പേര്‍ക്കും പൂര്‍ണ്ണമായും സംസ്ഥാനമാണ് ധനസഹായം നല്‍കുന്നത്. വിവിധ സൗജന്യ ചികിത്സകള്‍ക്കായി പ്രതിവര്‍ഷം 1600 കോടി രൂപയാണ് സര്‍ക്കാര്‍ ചെലവഴിക്കുന്നത്. എന്നാല്‍ കേന്ദ്രം സംസ്ഥാനത്തിന് നല്‍കുന്നത് 150 കോടി രൂപ മാത്രമാണ്. മൊത്തം ചെലവിന്റെ 10 ശതമാനം മാത്രമാണ് കേന്ദ്രം അനുവദിക്കുന്നത്.
അപൂര്‍വ രോഗങ്ങള്‍ക്ക് സൗജന്യചികിത്സാപദ്ധതികള്‍
രാജ്യത്ത് ആദ്യമായി അപൂര്‍വ രോഗചികിത്സയ്ക്കായി പ്രത്യേക പദ്ധതി ‘കെയര്‍’ ആരംഭിച്ചു. എസ്.എ.ടി. ആശുപത്രിയെ അപൂര്‍വ രോഗങ്ങളുടെ സെന്റര്‍ ഓഫ് എക്സലന്സ് ആയി ഉയര്‍ത്തി. എസ്.എ.ടി.യിലെ സെന്റര്‍ ഓഫ് എക്സലന്സ് വഴി വലിയ ചെലവുള്ള അപൂര്‍വ രോഗങ്ങള്‍ക്കുള്ള ചികിത്സ സൗജന്യമായി ചെയ്തു കൊടുക്കാന്‍ സാധിച്ചു. സംസ്ഥാനത്ത് ആദ്യമായി ലൈസോസോമല്‍ സ്റ്റോറേജ് രോഗങ്ങള്‍ക്ക് മരുന്ന് നല്‍കുന്ന പദ്ധതിയും ആരംഭിച്ചു. രാജ്യത്ത് ആദ്യമായി ഹീമോഫീലിയ ചികിത്സയില്‍ 18 വയസിന് താഴെയുള്ള മുഴുവന്‍ കുട്ടികള്‍ക്കും പ്രൊഫിലാക്സിസ് ചികിത്സ നല്‍കാനായി.
അര്‍ബുദ രോഗികള്‍ക്ക് കാരുണ്യസ്പര്‍ശം
കാന്‍സര്‍ ചികിത്സാ ചെലവ് ചുരുക്കുന്നതില്‍ രാജ്യത്തിനാകെ മാതൃകയാകുന്ന ചുവടുവയ്പ്പാണ് ഈ സര്‍ക്കാര്‍ നടത്തിയത്. കാന്‍സര്‍ രോഗബാധിതരായവര്‍ക്ക് പൊതുവിപണിയില്‍ ലഭിക്കുന്നതിനെ അപേക്ഷിച്ച് ഏറ്റവും കുറഞ്ഞ വിലയില്‍ മരുന്ന് ലഭ്യമാക്കാന്‍ കാരുണ്യ സ്പര്‍ശം കൗണ്ടറുകള്‍ എല്ലാ ജില്ലകളിലും സ്ഥാപിച്ചു. കേവലം മൂന്നര മാസം കൊണ്ട് രണ്ട് കോടിയിലധികം രൂപയുടെ മരുന്നുകളാണ് സര്‍ക്കാര്‍ വിതരണം ചെയ്തത്. പല മരുന്നുകള്‍ക്കും 88 ശതമാനം വരെ വിലകുറച്ചാണ് ലഭ്യമാക്കിയത്. തീര്‍ത്തും ലാഭരഹിതമായിട്ടാണ് (സീറോ പ്രോഫിറ്റ് ആന്റി കാന്‍സര്‍ ഡ്രഗ്‌സ്) ഈ മരുന്നുകള്‍ ലഭ്യമാക്കുന്നത്. ആരംഭത്തില്‍ 247 ബ്രാന്‍ഡഡ് ഓങ്കോളജി മരുന്നുകളായിരുന്നത് ഇപ്പോള്‍ 252 മരുന്നുകളാക്കി വര്‍ധിപ്പിച്ചിട്ടുണ്ട്.
മറ്റ് പല സംസ്ഥാനങ്ങളും കേരള മാതൃകയില്‍ ഇതുപോലെ നല്‍കുന്നതിനുള്ള പ്രവര്‍ത്തനങ്ങള്‍ ആരംഭിച്ചിട്ടുണ്ട്. 2025ല്‍ കൂടുതല്‍ കൗണ്ടറുകള്‍ സ്ഥാപിക്കാനാണ് ആരോഗ്യവകുപ്പിന്റെ ശ്രമം. കാസ്പ് പദ്ധതിയില്‍ അംഗമല്ലാത്ത അര്‍ഹരായവര്‍ക്ക് കാരുണ്യ ബെനവലന്റ് ഫണ്ടിലൂടെ ഒരു കുടുംബത്തിന് രണ്ട് ലക്ഷം രൂപയുടെ സൗജന്യ ചികിത്സാസഹായം ലഭ്യമാകുന്നു. വൃക്ക സംബദ്ധമായ അസുഖങ്ങള്‍ക്ക് മൂന്ന് ലക്ഷം രൂപ വരെ ഈ പദ്ധതിയിലൂടെ ചികത്സാസഹായം ലഭിക്കുന്നു. 18 വയസില്‍ താഴെയുള്ള കുട്ടികള്‍ക്ക് സര്‍ക്കാര്‍ ആശുപത്രികളില്‍ ആരോഗ്യ കിരണം പദ്ധതി വഴിയും സൗജന്യ ചികിത്സ ഉറപ്പാക്കുന്നു. ജന്മനായുള്ള ഹൃദ്രോഗം സമയബന്ധിതമായി ചികിത്സിക്കാനുള്ള ആരോഗ്യ വകുപ്പിന്റെ ഹൃദ്യം പദ്ധതിയിലൂടെ 7854 കുഞ്ഞുങ്ങള്‍ക്ക് സൗജന്യ ഹൃദയ ശസ്ത്രക്രിയ നടത്തി. ഹൃദ്രോഗത്തിന്റെ തീവ്രതയനുസരിച്ച് കാലതാമസമില്ലാതെ കുഞ്ഞുങ്ങള്‍ക്ക് വിദഗ്ധ ചികിത്സ ലഭ്യമാക്കുകയാണ് പദ്ധതിയുടെ ലക്ഷ്യം.
സ്വകാര്യമേഖലയില്‍ ലക്ഷക്കണക്കിന് രൂപ ചെലവ് വരുന്ന ചികിത്സകള്‍ സൗജന്യമായോ മിതമായ നിരക്കിലോ സര്‍ക്കാര്‍ മേഖലയില്‍ തുടങ്ങാന്‍ കഴിഞ്ഞു. അതില്‍ എടുത്തു പറയാവുന്നതാണ് കരള്‍ മാറ്റിവെക്കല്‍ ശസ്ത്രക്രിയ, മജ്ജ മാറ്റിവെക്കല്‍ ശസ്ത്രക്രിയ, റോബോട്ടിക്‌സ് ശസ്ത്രക്രിയ തുടങ്ങിയവ. ആദ്യമായി ജില്ലാ ആശുപത്രിതലത്തില്‍ വൃക്ക മാറ്റിവയ്ക്കല്‍ ശസ്ത്രക്രിയ ഈ കാലഘട്ടത്തില്‍ കേരളത്തില്‍ എറണാകുളം ജനറല്‍ ആശുപത്രിയില്‍ ആരംഭിച്ചു.
കേള്‍വിശേഷി നഷ്ടപ്പെട്ടവര്‍ക്കുള്ള ശ്രുതിതരംഗം പദ്ധതി ആരോഗ്യ വകുപ്പ് ഏറ്റെടുത്ത് വിജയകരമായി നടപ്പിലാക്കി വരുന്നു. ആശുപത്രികളില്‍ എത്താതെ രോഗികള്‍ക്ക് വീട്ടില്‍ തന്നെ സൗജന്യമായി ഡയാലിസിസ് ചെയ്യാന്‍ കഴിയുന്ന പെരിറ്റോണിയല്‍ ഡയാലിസിസ് പദ്ധതി എല്ലാ ജില്ലകളിലും ആരംഭിച്ചു. അധികദൂരം യാത്ര ചെയ്യാതെ അവരുടെ ജില്ലകളില്‍ തന്നെ സൗജന്യ സ്‌ട്രോക്ക് ചികിത്സ ലഭ്യമാകുന്ന സംവിധാനം 10 ജില്ലകളില്‍ യാഥാര്‍ഥ്യമാക്കി. ഇങ്ങനെ ധാരാളം വികസന പ്രവര്‍ത്തനങ്ങളാണ് ആരോഗ്യമേഖലയില്‍ നടന്നുവരുന്നത്.
ആരോഗ്യമേഖലയില്‍ സര്‍ക്കാര്‍ നടത്തിയ ഇടപെടലുകള്‍ക്ക് ഫലമുണ്ടായി. നാഷണല്‍ സ്റ്റാറ്റിറ്റിക്‌സ് സര്‍വേ പ്രകാരം പത്ത് വര്‍ഷം മുമ്പ് സംസ്ഥാനത്തെ ആരോഗ്യത്തിലെ ഔട്ട് ഓഫ് പോക്കറ്റ് എക്‌സ്‌പെന്‍ഡിച്ചറിനേക്കാള്‍ ചികിത്സാച്ചെലവ് പകുതിയായി കുറഞ്ഞിട്ടുണ്ട്. രാജ്യത്ത് ഏറ്റവും കൂടുതല്‍ സൗജന്യചികിത്സ നല്‍കുന്ന സംസ്ഥാനം കേരളമായതിനാലാണ് ഈ നേട്ടം കൈവരിക്കാനായത്. സ്റ്റേറ്റ് ഹെല്‍ത്ത് ഏജന്‍സി വരുന്നതിന് മുമ്പ് 30,000 രൂപ മാത്രമാണ് സൗജന്യ ചികിത്സയ്ക്കായി നല്‍കിയിരുന്നത്. ഈ സര്‍ക്കാരിന്റെ തുടക്കത്തില്‍ രണ്ടര ലക്ഷം ക്ലെയിമുകളാണ് സൗജന്യ ചികിത്സയ്ക്ക് ഉണ്ടായിരുന്നത്. ഇപ്പോഴത് ആറേമുക്കാല്‍ ലക്ഷം കഴിഞ്ഞു. അതായത് 30,000 രൂപയില്‍ നിന്നും അഞ്ച് ലക്ഷം രൂപ ഒരു കുടുംബത്തിലെ ഓരോ അംഗത്തിനും ചികിത്സാ ആനുകൂല്യം ലഭ്യമാക്കുന്നു. സൗജന്യചികിത്സയില്‍ കേരളം നടത്തിയ ശക്തമായ നിലപാടിന്റേയും പ്രവര്‍ത്തനങ്ങളുടേയും ഫലമാണിത്.
