സുരക്ഷിതവാസം സുഗമം
പട്ടിക വിഭാഗക്കാരുടെ ഭവന പൂര്‍ത്തീകരണവും പുനരുദ്ധാരണവും ലക്ഷ്യമിട്ട് 2022-23 സാമ്പത്തിക വര്‍ഷം മുതല്‍ സേഫ് പദ്ധതി (SAFE- Secure Accommodation and Facility Enhancement) നടപ്പിലാക്കി വരുന്നു. പദ്ധതി പ്രകാരം ഭവന പൂര്‍ത്തീകരണം/പുനരുദ്ധാരണം എന്നിവയ്ക്കായി ആകെ രണ്ട് ലക്ഷം രൂപ മൂന്ന് ഗഡുക്കളായി വിതരണം ചെയ്യുന്നു. ഒന്നാം ഗഡു 50,000/ രൂപ, രണ്ടാം ഗഡു 1,00,000/ രൂപ മൂന്നാം ഗഡു 50,000/ രൂപ ക്രമത്തിലാണ് തുക അനുവദിക്കുന്നത്.
അര്‍ഹതാ മാനദണ്ഡങ്ങള്‍
- വരുമാന പരിധി ഒരു ലക്ഷം രൂപ വരെ.
- 2010 ഏപ്രില്‍ 1 നു ശേഷം ഭവന പൂര്‍ത്തീകരണം നടത്തിയിട്ടുള്ള പട്ടികജാതി കുടുംബങ്ങള്‍. (01.04.2010 മുതല്‍ 26.09.2017 വരെ)
- വീട് അപേക്ഷകന്റേയോ ഭാര്യ/ഭര്‍ത്താവിന്റെയോ പേരില്‍ ഉള്ളതായിരിക്കണം. കഴിഞ്ഞ അഞ്ച് വര്‍ഷത്തിനുള്ളില്‍ ഭവന നിര്‍മ്മാണത്തിനോ ഭവന പുനരുദ്ധാരണത്തിനോ ഭവന പൂര്‍ത്തീകരണത്തിനോ സര്‍ക്കാര്‍ ധനസഹായം ലഭിച്ചവരെ പരിഗണിക്കില്ല.
- ഇരുനില വീടുകള്‍ പരിഗണിക്കില്ല.
ആവശ്യമായ രേഖകള്‍
- അപേക്ഷകന്റെ ജാതി വരുമാന സര്‍ട്ടിഫിക്കറ്റുകള്‍.
- കൈവശ / ഉടമസ്ഥാവകാശ സര്‍ട്ടിഫിക്കറ്റുകള്‍.
- ആവശ്യമായ നിര്‍മ്മാണ ഘടകങ്ങള്‍ അടങ്ങിയ അപേക്ഷകന്റെ സ്റ്റേറ്റ്‌മെൻ്റ്.
- അവസാന ഗഡു കൈപ്പറ്റിയത് സംബന്ധിച്ച് വകുപ്പ്/എഞ്ചിനീയറില്‍ നിന്നുള്ള സാക്ഷ്യപത്രം മുമ്പ് മെയ്ൻ്റനൻസ് ഗ്രാന്റ് ലഭിച്ചത് സംബന്ധിച്ച സാക്ഷ്യപത്രം.
- നിശ്ചിത മാതൃകയിലുള്ള മേല്‍ക്കൂര നിര്‍മ്മിക്കാത്തതിനാല്‍ അവസാന ഗഡു സംഖ്യ നല്‍കിയിട്ടില്ലെന്നത് സംബന്ധിച്ച് വകുപ്പ് / ഏജന്‍സിയുടെ സാക്ഷ്യപത്രം.
- സ്വന്തമായി ഭവനം നിര്‍മ്മിച്ചവര്‍ വീടിന്റെ കാലപ്പഴക്കം തെളിയിക്കുന്ന സാക്ഷ്യപത്രം സെക്രട്ടറി / അസി.എഞ്ചിനീയറില്‍ നിന്നും ലഭ്യമാക്കണം.
- മുമ്പ് മെയ്ൻ്റനൻസ് ഗ്രാന്റ്, റിപ്പയര്‍ എന്നിവ ലഭിച്ചത് സംബന്ധിച്ച സാക്ഷ്യപത്രം.
- ആധാര്‍, റേഷന്‍ കാര്‍ഡ്, പാസ്സ് ബുക്ക് എന്നിവയുടെ പകര്‍പ്പ്.
മുന്‍ഗണന മാനദണ്ഡങ്ങള്‍
മേല്‍ക്കൂര, ടോയിലറ്റ് എന്നിവയില്ലാത്ത പൂര്‍ത്തിയാകാത്ത കുടുംബങ്ങള്‍ക്ക് മുന്‍ഗണന.
തുടര്‍ന്നുള്ള മുന്‍ഗണന
- ഭര്‍ത്താവ് മരണപ്പെട്ട്/ഉപേക്ഷിച്ച വനിതകള്‍ കുടുംബനാഥയായ കുടുംബം.
- ഭിന്നശേഷിക്കാര്‍ /മാരകരോഗങ്ങള്‍ ബാധിച്ചവരുള്ള കുടുംബം.
- വിദ്യാര്‍ഥികളുള്ള കുടുംബം.
- വനിതകള്‍ മാത്രമുള്ള കുടുംബം.
- ഒന്നിലധികം വിദ്യാര്‍ഥിനികളുള്ള കുടുംബം.
- മുന്‍പ് മെയ്ൻ്റനൻസ് ഗ്രാന്റ് ലഭിക്കാത്ത കുടുംബം.
- 800 ച.അടിയില്‍ താഴെ വിസ്തീര്‍ണ്ണമുള്ള വീട്.
- പഠനമുറി അനുവദിച്ചിട്ടില്ലാത്ത കുടുംബം.
- നിര്‍മ്മാണ ഘടകങ്ങളില്‍ അഞ്ചില്‍ അധികം ഘടകങ്ങള്‍ ആവശ്യമുള്ള കുടുംബം.
- 50,000 രൂപയില്‍ താഴെ വാര്‍ഷിക വരുമാനമുള്ള കുടുംബം.
