ഒന്നാമത് തന്നെ
കരള്‍ മാറ്റി വയ്ക്കല്‍ ശസ്ത്രക്രിയയ്ക്ക് കോട്ടയം മെഡിക്കല്‍ കോളേജിനെ സജ്ജമാക്കി. തിരുവനന്തപുരം മെഡിക്കല്‍ കോളേജില്‍ ഉടന്‍ സജ്ജമാകും. കോഴിക്കോട് മെഡിക്കല്‍ കോളേജിലും കരള്‍ മാറ്റിവയ്ക്കല്‍ ശസ്ത്രക്രിയ സജ്ജമാക്കും.
സംസ്ഥാനത്തെ മാതൃ ശിശു സൗഹൃദമാക്കുന്നതിന് സമഗ്ര രൂപരേഖയുണ്ടാക്കാന്‍ തീരുമാനിച്ചു. ന്യൂമോകോക്കല്‍ രോഗങ്ങള്‍ക്കെതിരായി കുഞ്ഞുങ്ങള്‍ക്കായി ഒക്ടോബര്‍ ഒന്ന് മുതല്‍ പുതിയൊരു വാക്‌സിനേഷൻ കൂടി ആരംഭിച്ചു. യൂണിവേഴ്‌സൽ ഇമ്മ്യൂണൈസേഷന്‍ പരിപാടിയുടെ ഭാഗമായി പുതുതായി ഉള്‍പ്പെടുത്തിയ ന്യൂമോകോക്കല്‍ കോണ്‍ജുഗേറ്റ് വാക്‌സിൻ (പിസിവി) ആണ് അടുത്ത മാസം മുതല്‍ നല്‍കിത്തുടങ്ങുന്നത്.
350 സര്‍ക്കാര്‍ ആശുപത്രികളില്‍ ഇ-ഹെല്‍ത്ത് സംവിധാനം നടപ്പിലാക്കി. സംസ്ഥാനത്ത് ആദ്യമായി വെബ് പോര്‍ട്ടല്‍ വഴി ആശുപത്രി അപ്പോയ്മെന്റ് ഓണ്‍ലൈന്‍ വഴി എടുക്കാനുള്ള സംവിധാനം സജ്ജമാക്കി. 300-ല്‍ പരം ആശുപത്രികളില്‍ ഇ ഹെല്‍ത്ത് വെബ് പോര്‍ട്ടലിലൂടെ മുന്‍കൂട്ടിയുള്ള ഓണ്‍ലൈന്‍ ബുക്കിംഗ് വഴി നിശ്ചിത തീയതിയിലും സമയത്തുംഡോക്‌ടറുടെ സേവനം ലഭിക്കുന്നു. ഒ.പി ടിക്കറ്റുകള്‍, ടോക്കണ്‍ സ്ലിപ്പുകള്‍ എന്നിവയുടെ ഓണ്‍ലൈന്‍ പ്രിന്റിംഗ് സാധ്യമാകും.
സംസ്ഥാനത്തെ ആരോഗ്യ രംഗത്തെ ഗവേഷണം ശക്തമാക്കാന്‍ നടപടി സ്വീകരിച്ചു. നിലവിലുള്ളതും പുതിയതുമായ രോഗങ്ങള്‍ വരുമ്പോള്‍ ഫലപ്രദമായ ഗവേഷണം ഇല്ലാത്തതാണ് പ്രധാന പ്രശ്‌നം.
ഇതിന്റെ പശ്ചാത്തലത്തിലാണ് ഗവേഷണം ശക്തമാക്കിയത്. സംസ്ഥാനത്ത് എയിംസ് (ആള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ്) സ്ഥാപിക്കാനുള്ള നടപടികള്‍ ത്വരിതപ്പെടുത്തി. ക്ലബ് ഫൂട്ട് രഹിത കേരളത്തിനായി സംസ്ഥാന ആരോഗ്യ വകുപ്പ് അന്താ രാഷ്ട്ര കോണ്‍ഫറന്‍സ് സംഘടിപ്പിച്ചു.
കോവിഡ് പശ്ചാത്തലത്തില്‍ വീട്ടിലിരുന്ന് ഡോക്‌ടറെ കാണാന്‍ കഴിയുന്ന ഇ-സഞ്ജീവനി സേവനം ശക്തിപ്പെടുത്തി. സ്പെഷ്യാലിറ്റി സേവനങ്ങള്‍ അനുവദിച്ചു. 4700ലധികം ഡോക്‌ടർമാർ വഴി മൂന്ന് ലക്ഷത്തിലധികം പേര്‍ക്കാണ് ഇ-സഞ്ജീവനി വഴി ചികിത്സ നല്‍കിയത്. സംസ്ഥാനത്തെ ഇ-സഞ്ജീവനി ഡോക്‌ടർ ടു ഡോക്‌ടർ സേവനങ്ങള്‍ എല്ലാ ജില്ലകളിലേക്കും വ്യാപിപ്പിച്ചു.
വിവിധ രാജ്യങ്ങളില്‍ ഒമിക്രോണ്‍ സ്ഥിരീകരിച്ച സാഹചര്യത്തില്‍ സംസ്ഥാനത്തെ ഓക്‌സിജൻ ലഭ്യതയും ഐസിയു വെന്റിലേറ്റര്‍ സൗകര്യങ്ങളും ഉറപ്പ് വരുത്തി.
പ്രതിദിനം 354.43 മെട്രിക് ടണ്‍ ഓക്‌സിജനാണ് സംസ്ഥാനം ഉത്പാദിപ്പിക്കുന്നത്. അതേ സമയം സംസ്ഥാനത്ത് പ്രതിദിനം 65 മെട്രിക് ടണ്‍ ഓക്‌സിജൻ മാത്രമാണ് ആവശ്യമായി വരുന്നത്. മുമ്പ് നാല് ഓക്‌സിജൻ ജനറേറ്ററുകള്‍ മാത്രമാണുണ്ടായത്. മൂന്നാം തരംഗം മുന്നില്‍ കണ്ട് 38 ഓക്‌സിജൻ ജനറേറ്ററുകള്‍ അധികമായി സ്ഥാപിച്ചു. ഇതു കൂടാതെ 18 ഓക്‌സിജൻ ജനറേറ്ററുകള്‍ സ്ഥാപിക്കുന്നതിന്റെ പ്രവര്‍ത്തനങ്ങള്‍ നടന്നു വരുന്നു.
കോവിഡ് സാഹചര്യത്തില്‍ പരമാവധി പേര്‍ക്ക് കോവിഡ് വാക്‌സിൻ നല്‍കി സുരക്ഷിതമാക്കാനാണ് ശ്രമിക്കുന്നത്. ആദ്യ ഡോസ് വാക്‌സിനേഷൻ 100 ശതമാനത്തിലേക്കടുക്കുകയാണ്. രണ്ടാം ഡോസ് 82 ശതമാനത്തിലധികം കഴിഞ്ഞു. കുട്ടികളുടെ വാക്‌സിനേഷനും കരുതല്‍ ഡോസ് വാക്‌സിനേഷനും അതി വേഗത്തില്‍ പുരോഗമിക്കുകയാണ്. ഇങ്ങനെ ജനങ്ങളുടെ ആരോഗ്യത്തിനും ചികിത്സയ്ക്കും വികസനത്തിനും ആവശ്യമായ കരുതലോടെ ആരോഗ്യ മേഖല മുന്നേറുകയാണ്‌.
