ആത്മാവിന്റെ ഭാഗം
ആത്മാവിന്റെ ഭാഗം
കെ. ബി. ഗണേഷ് കുമാര്‍
ഗതാഗത വകുപ്പ് മന്ത്രി
കൊല്ലം ഒരു പുരാതന ഗാനത്തിന്റെ ശോഭയില്‍ നദികള്‍ ആനന്ദം പ്രദാനം ചെയ്യുന്ന സ്വപ്‌നങ്ങൾ കൊണ്ടുള്ള പ്രദേശം. ഇതൊരു ഭൂമിക മാത്രമല്ല, ഇവിടെ ജീവിക്കുന്ന ഓരോ വ്യക്തിയുടെയും ഹൃദയത്തില്‍ ആഴത്തില്‍ വേരുറപ്പിച്ചു നിലനിന്നു പോകുന്ന അഭിമാനമാണ്. ‘എന്റെ കൊല്ലം’ എന്നു ഞാന്‍ പറയുമ്പോള്‍, അത് വെറും വാക്കുകള്‍ അല്ല. എന്റെ ജീവിതത്തോട് ചേർന്ന് നിൽക്കുന്ന ഒരു ജീവിത സത്യം ആണ്, എന്റെ ആത്മാവിന്റെ ഒരു ഭാഗം.
കൊല്ലം അതിന്റെ ഭൂമി ശാസ്ത്രം കൊണ്ട് മാത്രം നിർവചിക്കപ്പെടുന്ന പ്രദേശം അല്ല; ഈ മലകളും താഴ്വരകളും വെറും ഭൗതിക ചിഹ്നങ്ങള്‍ മാത്രമല്ല, എന്റെ നില നില്‍പ്പിന്റെ, ഹൃദയ സ്‌പന്ദനമായ, ബോധനം രൂപപ്പെടുത്തുകയും, ജീവിതത്തിലൂടെ എന്നെ വഴി കാട്ടുകയും ചെയ്‌തവയാണ്. കൊല്ലം നമ്മെ മാടി വിളിക്കുന്നത് കേവലം അതിന്റെ ഭൗതിക മനോഹാരിത കൊണ്ടു മാത്രമല്ല, ആഴത്തിലുള്ള സാംസ്‌കാരികത കൊണ്ടു കൂടിയാണ്. പരമ്പരാഗത കലാ രൂപങ്ങളും ആചാരങ്ങളും നാടന്‍ കലകളുമെല്ലാം ഈ നാടിന്റെ മായാത്ത മുഖമുദ്രകളാണ്. ചെണ്ടയുടെ താളം, മോഹിനിയാട്ടത്തിന്റെ ഭാവം, കൊട്ടാരക്കര മഹാഗണപതി ക്ഷേത്രത്തിന്റെ ആത്മീയ പ്രാധാന്യം എന്നിവയെല്ലാം മറ്റൊരിടത്തു നിന്നും പകര്‍ത്താന്‍ കഴിയാത്ത ആനന്ദമാണ്.
ഏറ്റവും പ്രധാനപ്പെട്ട പ്രാചീന പശ്ചാത്തലമാണ് പത്തനാപുരം പട്ടണം. തമിഴ്‌നാടിനോട് ചേർന്ന് കിടക്കുന്ന പ്രദേശം എന്ന നിലയില്‍ തിരുവിതാംകൂറിന്റെ ഏറ്റവും വലിയ വ്യാപാര വിപണന കേന്ദ്രമായിരുന്നു. വനത്തില്‍ നിന്നും പിടികൂടിയിരുന്ന ആനകളെ പരിശീലിപ്പിച്ചെടുക്കുന്ന കേന്ദ്രം പത്തനാപുരത്താണ്. പത്താന പുരം എന്ന പേരില്‍ നിന്നാണ് പത്തനാപുരം ഉണ്ടായതെന്നും പറയപ്പെടുന്നു.
മറ്റൊരു ആകര്‍ഷണീയത ആയിരുന്നു കൊല്ലം-ചെങ്കോട്ട മീറ്റര്‍ ഗേജ് റെയില്‍ പാത. കല്ലടയാറിന്റെയും തെന്മല കാടുകളുടെയും ദൃശ്യ ഭംഗി നുകർന്ന് ആ മീറ്റര്‍ ഗേജ് ട്രെയിന്‍ യാത്ര ചെയ്‌തിട്ടുള്ളവർക്ക് അവിസ്‌മരണീയമായ ഒരനുഭവമായി അത് നിലനിൽക്കുന്നു.
കൊല്ലത്തിന്റെ ആത്മാവ് എക്കാലവും നിന്നിട്ടുള്ളത് വൈവിധ്യത്തിലും ഒത്തൊരുമയുള്ള ജനത്തിന്റെ ഐക്യ ബോധത്തില്‍ ആണ്. കൊല്ലം ഒരുപാട് വര്‍ഷങ്ങളായി അനേകം നേട്ടങ്ങളും ഉന്നതികളും നേടിയിട്ടുണ്ട്. സമീപ കാലങ്ങളില്‍ കൊല്ലത്തിന്റെ ഭാവി പ്രതീക്ഷകള്‍ വാനോളം എത്തി എന്ന് ഞാന്‍ വിശ്വസിക്കുന്നു. 75-ാം വാര്‍ഷിക ആഘോഷത്തില്‍, ഇത് വെറും ഭരണ മികവിന്റെ നേട്ടം മാത്രമായി ചുരുങ്ങുന്നില്ല മറിച്ചു കൊല്ലത്തിന്റെ ജീവാത്മാവായ ജനതയുടെ ഒത്തൊരുമയുടെ കൂടി നേര്‍ സാക്ഷ്യമായാണ് കാണാന്‍ സാധിക്കുക. പൈതൃകത്തില്‍ അഭിമാനിക്കുന്ന ഒരു ജനതയുടെ പ്രശസ്‌തി കാലാതീതമായി തുടരട്ടെ. കൊല്ലം തഴച്ചു വളരുന്നതിനൊപ്പം അവിടുത്തെ ജനങ്ങളോടും പൈതൃകത്തോടുമുള്ള സ്നേഹം ഒരിക്കലും മങ്ങാതിരിക്കട്ടെ എന്നാണ് എന്റെ പ്രത്യാശ.